Nithumni Baibal cawnnak ah siangngakchia nu pakhat nih bia a ka hal. Saya, “thinhun hi sual a si maw?” tiah.
“Nangmah nih zeitindah na ruah?” tiah ka hei hal chin. “Sual a si ko tiah ka ruah,” tiah a ti. Ngakchia dang kha ka hal chin hna. Thinhun hi sual a si ko tiah a ruatmi nan kut thlir tuah u tiah ka ti hna. Hnarcheu nak tam nih an kut an thlir.
Lehnak tawite ka ngeih hna. A biahalnak ning tein ‘thinhun hi sual a si hrimhrim lo.’ Nain kan thinhunnak nih sualnak chungah fawi tein a kan luhpi khawh caah kan i ralrin a herh. Phundang chim ahcun kan thin a hun ahcun sualnak innpi innka hram ah kan um bantuk a si.
Efesa 4:26 chungah: Na thin a hun ahcun na thinhunnak kha sualnak chung i an luhpitu siter hlah; cun na thinhunnak cu ni tlakter hlah.
Kan thinhunnak hi nikhat cung a si awk a si lo. Ni a tlak hlan hrimhrim ah ngaihthiamnak lam kan kawl i, kan i ngaihthiam awk a si.
Matt 18: 21-22 chungah: Peter cu Jesuh sinah khan a ra i, “Bawipa, ka unau pakhatkhat nih ka cungah sualnak tuah seh law voi zeizat dah ka ngaihthiam lai? Voi sarih tiang maw?” tiah a hal. Jesuh nih cun, “Sihlah, voi sarih si loin voi sawm sarih voi sarih.
Kan thinhunnak kan tei khawhnak dingah a biapibik cu THLACAMNAK hi a si ko. Cucaah thinhun hi sual a si lo. Nain sualnak chungah kan thinhunnak nih a kan luhpi nak hnga lo Pathian sinah bawmh kan hal awk a si.
Kan fale kum 10-13 karlak a hlei in nu pawl hi an pum sining aa thlen lio caan a si caah ing-ai chiat le thintawi phun in an um lio caan te si dawh a si. Cuti nulepa cungah maw, an hawile cungah maw an thin a hun pah tawn lengmangmi kha sual ah an ruah caah a si kho men tiah ka ruah..