Ṭangti hriamtlaibu phuthum nih Shan ramkulh chaklei Kawl ralkap sakhan pawl cu 10/27/23 thokin nihin 11/06/23 tiang pehzulh in an tuk cuahmah caah nihin in cun ni 11 nak a hung si cang. Kapxhnih i kahnak zong a fak ngaingai. November 6 ni ah ralkap sakhan 3 zong an lak chap tiah theih a si.
10/27/23 thok in Kawl ralkap sakhan pawl a la cuahmahmi ṭangṭi hriamtlaibu 3 hna cu: Kokang- Myanmar National Democratic Alliance Army (MNDAA), Ta’ang National Liberation Army (TNLA) le Arakan Army (AA) hna hi an si.
“Nihin i tuknak cu Kokang hrawngah a si i ralkap sakhan 3 kan lak. Ral tuknak hi a dai rih lo. Pehzulh peng a si rih ko,” tiah MNDAA chungtel pakhat nih a chim. Kunlong lei zongah i tuknak a fak rih ko tiah a peh chap.
“ Nihin tiang Kawl ralkap sakhan 120 renglo kan lak cang. Thanlwin tiva in nichuah lei kap cu kanmah kut ah a um ko cang,” tiah MNDAA chimnak nawlngei pakhat nih a chim. Namkham sakhan zong TNLA le Mandalay PDF i bawmh in an tuk hna caah palik sakhan pakhat zong an lak chap tiah a ti.
Shan ramkulh le hmun dangdang ah ralkap sakhan 100 renglo an lak cang timi le khualipi 4 hriamtlaibu nih an uk cang timi hi a hman lomi a si tiah Kawl ralkap lei nih cun an chim ve. Kawl ralkap lei nih lehrulhnak fak kan tuah hrimhrim lai tiah an chim chap. —VOA