Minung hi kan muisam kan sining aa dan cio bantukin kan khuaruahning, kan duhmi pawl zong an rak i dang cio. Ngakchia cu nulepa zohkhenhnak tangah a um rihmi an si caah an duhmi le an duhnak pawl hi nulepa nih rak theihthiam an biapi tuk.
Ngakchia an si rih ko tiah nulepa duhning in mawngh awk an rak ṭha hrimhrim lo. Zeicahtiah lungthin a ngei vemi an si caah an duhnak kha zulhpiak thiam le theihpiak thiam an rak herh tuk ve.
Ngakchia nih nulepa sinin an duhmi tampi lakah ngakchia tamdeuh nih an duhbikmi pali cu;
- Dawt: Minung a simi paoh nih dawt hi kan rak duh dih bantukin ngakchia zong nih nulepa dawtmi si hi an rak duhbikmi a rak si. Hmurka in kan fale kan dawt hna nak kong kan chimh lengmang hna a herh. Cu kan dawt hna nak cu hmurka lawng si loin tuahsernak zongin kan langhter a biapi.
- Zohkhenh: Nulepa nih ti le rawl timhtuah piak le rawl chuanpiak kha ngakchia nih an rak duh. Thilhruk aih ding tiang kha nulepa nih zohpi an rak duh. Ngakchia nih an ei dingmi kongah nulepa kan daithlan ahcun ngakchia ing-aichiat in an i la kho. Zohkhenhnak ṭha ngakchia nih an duhdih.
- Thazaang pek: Ngakchia hi anmah le kum rup in an tonmi thilrit an rak um ve. Cucu thazaang pek, an thilrit chawn kha an rak duh ve. An i lawmhnak ah lawmhnak in thazang pek an herh i an duh. An ngaihchiat caan ah thazaang pek thiam an biapi tuk.
- Caan pek: Ngakchia nih nulepa caan pek an rak duh tuk. Pa an si le bang ahcun lenlecelhpi kha an rak duh. Caan hmanti deuhdeuh paoh ah nulepa le fale pehtlaihnak ah a ṭha chinchin.
Ngakchia nih nulepa sinin an duhlomi tampi lakah pathum hna cu;
- Hro: Awhrang in chawnhpiak hi ngakchia tamdeuh nih an rak duh hrimhrim lo.
- Soi: An tlamtlin lonak ah soi hi ngakchia nih an rak duhlomi a si ve.
- Midang he tahchunh: Anih cu ca a thiam, chimh a ngai, cucu a tuah khawh tbk in ngakchia kha midang he kan tahchunhmi hna kha an rak celh lo ngai.
Nulepa le fale pehtlaihnak a tluannak dingah nulepa nih ngakchia an duhnak kha theihpiak thiam le an duhlomi zong theihpiak thiam hi a rak biapi tuk.