Nai hrawng ka ruahmi tampi lakah aa telmi pakhat cu US ah kan hrinmi kan fale an hmailei kong hi a si. Tutan ah vun langhter ka duhmi cu kan miphun chungah kan fale cheukhat (ngakchia, mino) an taksa cu a dam nain lungthin lei ah a dam lomi an um pahmi kong hi a si. Cu lungthin lei damlonak cu upa, mino le ngakchia tiin kan ton khawh dihmi a rak si. Tulio zongah kan ton cuahmah bantukin hmailei zongah kan ton cuahmah dingmi a si caah a biapi tuk tiah ka ruah.
Minung kan nunnak ah taksa damnak hi a biapi tuk hringhran. Taksa damnak pinah lungthin lei damnak hi a biapi taktak fawn. Kan taksa a dam ko zongah fak tukin lungthin lei dam lo khawh a rak si tho tho. A hleiin US ram ahhin lungthin lei damlonak a karh. Cu hmanh ah mino tete nih lungthin lei dam lonak hi fak ngai in an ton cuahmah. Kan miphun zong nih kan ton cuahmah ve.
Pew Research Center nih a langter ningah nihin US ram ah hringtu nulepa tambik nih an fale kongah an thin a phan bikmi cu an fale hna lungthin lei damlonak nih a tlak sual hna lai tihi a si.
US ram nulepa zatuak 40 tluk nih an fale lungthin lei dam lonak nih a tlak sual hna lai tiah phannak an ngei i, zatuak 35 nih an fale hi an pawngkam nih nekmi (nihsawhmi) an si sual lai tihi an phang. Cun zatuak 23 hrawng nulepa nih an fale le rithaisi an hmang sual lai ti an phan ve.
Laimi nulepa zong nih a cunglei langhtermi 3 hi kan fale caah kan phan bikmi an si lai tiah ka zumh. Zeitindah kan i runven lai timi zong kan ruah ngaingai a herh ko. Covid-19 hnu hrimhrim in US ram mino chungah lungthin lei dam lonak le sualnak (ritnak sii) a karh tuk ti a si.
Cucaah ramthumnak a phanmi nulepa hna nih bia kan i hal dingmi cu; kan fale hi an dam taktak maw? A hleiin an lungthin a dam maw? An sianginn kainak ah miphun dang nih an nek sual hna maw? Kan fale US chuakmi caah ka phan bik vemi cu lungthin lei dam lonak nih a tlak sual hna lai tihi a si..
—-
##peh ṭhan ding