Minung kan nunnak ah thaw kan dawp kan chuah khawhmi hi Pathian laksawng a si. Kanmah thilti khawhnak zeihmanh a um hrimhrim lo. Cu nunnak thaw kan dawp/chuah khawhmi cu Bawipa nih a zungzal caah pekmi si loin caankhat chikhat caah hlanh chungmi men kan rak si. Kan thaw a dih te tik ahcun minung kan taksa pum cu a dih te ko hnga.
Nihin vawlei ahhin minit pakhat ah minung 106 renglo lengmang an thi ti a si. Kum khat ah 56 million hrawng an nun a dih. Hi vawlei kan nunnak hi kum 70-80 hrawng lawng a si. Kan taksa nunnak cu ri a ngei i a tawi ko.
Nikhat ah kan rak chuak i nikhat chungah a dih te dingmi men kan si. Kan dawt tukmi hna zong nikhat khat ah an dongh caan kan phan te ko lai. Kanmah cio zong nikhat khat ah a thi te dingmi lawngte kan si.
Cucaah nunnak hi a sunglawi tukmi Pathian laksawng a si zia kan hngalh ṭhan lengmang a herh ko. Kanmah le kan dirhmun, kan sining cioah kan vuivai sual maw?
A sunglawi tukmi nunnak kan ngeihmi chungah Pathian pakhatnak a chia i dawtnak he mikip sinah kan caan kan hman ding hi a biapi hringhran.
Nizan cu a luan cang caah i buaipi tuk awk a um ti lo. Thaizing zong kan phak rih lo caah thaizing kongah ruahchung awk le lungre theih tuk awk a um lo.
A sunglawi tukmi nihin kan nunnak chungah Bawipa he kan i pehtlaihnak zeidah a lawh?Jesuh Khrih cu kan Khamhtu le kan Bawipa ah cohlang in kan zum taktak maw? Amah Khrih hnuzulhnak leiah kan nunnak kan hmang ve maw? Kan nunnak caan hi ri a ngeimi a si i a tawi tuk hringhran. Kan caan ṭha Bawipa he hman thiam a biapi..