Israel le Palestine karlak buainak fak a chuak ṭhan
Tuzing October 7 zinglei ah Palestine ram Hamas ralkap lei nih hriamnam ngan in voi 1000 renglo Israel ramri khua hmunkip ah kahnak an rak tuah pinah Israel ramri hmun cheukhat ah Hamas ralkap pawl cu a thli in hriamnam he an rak luhhnawh hna caah a tlawmbik Israel minung 100 an nunnak a liam i, minung 900 renglo hliamhma an tuar tiah BBC nih a thanh.
“Ral chungah kan um, kan ral hna nih an tuahmi cu an zun ṭhan hrimhrim lai,” tiah Israel PM nih biachimnak a ngeih. Israel PM nih biachimnak a ngeihmi caanrau lo ah Israel van ralkap nih Palestine ram Gaza ah lehrulhnak fak taktak in an tuah colh caah minung 200 renglo an nunnak a liam pinah minung 1000 renglo hliamhma an tuar ve tiah theih a si.
Israel le Palestine ram hnih karlak buainak hi linhsat ṭhan ngai dawh an si. Tukum chungah tuzing a cangmi hi a fakbik a si. US cozah zong nih Israel ram nih an tonmi ngaihchiatnak ah tuarpinak le an ram mipi humhimnak ah an dirhkamh hnanak cathanh zong an chuah colh. —BBC
