A Dammi Innchungkhar Sinak Dingah Zeidah A Biapi?

A dammi innchungkhar sinak dingah thil biapi tampi an um ko lai nain a biapi khun tiah ruahmi pakhat cu innchungkhar ah a lubik a simi nu le va pehtlaihnak a ṭhat ding hi a si. 

Innchungkhar ah a lamkip in nu le va kan i pehtlaihnak a ṭhat ahcun innchungkhar cu a dam ko lai. Nain nu le va kan i pehtlaihnak a ṭhatlo ahcun innchungkhar cu a zaw ko lai. 

Innchungkhar ah pehtlaihnak a ṭhatnak dingah cun nu le va theihthiamnak a biapi tuk. 

‘Nu nih an pasal le sinin an duhbikmi pakhat ah aa telmi cu dawtnak hmurka thlum hi a si. Pasal le nih an nupi sinin an duhbikmi ah aa tel vemi pakhat cu upatnak pek hi a si ve’.

Dawtnak hmurka thlum le i upatnak hna hi lenglei velhle phun in caansau kalpi awk a rak ṭha lo. Dawtnak le upatnak hna hi lungthin chungin a chuakmi an si.

Innchungkhar pakhat cio kan dam ahcun kan Khrihfabu ah damnak a um lai i, kan Khrihfabu a dam ahcun kan zatlang ah damnak a um fawn lai. Kan zatlang ah damnak a um ahcun vawlei hi a dam i a nuammi a si ko lai.