Hringtu nulepa dirhmun in kan fale he kan i pehtlaihnak zeidah a lawh tihi nulepa nih biapi ngai ah kan ruah a herh. Pehtlaihnak ṭha kan fale he kan ngei kho maw? Asiloah kan fale he pehtlaihnak um huaha loin dah kan caan kan liamter!
Nulepa he pehtlaihnak ṭha a ngeimi ngakchia tamdeuh cu anmah le anmah zumhnak an ngei i, an ral a ṭha, an mithmai ah lawmhnak a tlang. Nain nulepa he pehtlaihnak ṭha a ngei lomi ngakchia tamdeuh cu anmah le anmah zumhnak an ngeih lo pinah an ral zong a chia deuh tiah hlathlainak nih an langhter.
Nulepa le fale pehtlaihnak ṭha ngeih khawh hi innchungkhar damnak a si pinah ngakchia an ṭhannak hrim ah a herh tukmi a rak si. A biapi tukmi fale he pehtlaihnak cu nulepa nih kan ser a herh. Kan fale caah caan kan pek a herh fawn.
Nunphung, holh aa dannak ah khua kan sak tikah nulepa tampi nih thil sining kan theihlomi a tam, holh kan thiam tuk ti lo. Nain kan fale cu hi ram ah a chuakmi an si tikah US nunphung, holh chungah an um kho colh. Cutikah nulepa le fale karlak ah i dannak tete an um pah caah pehtlaihnak ṭha ser hi thilhar ngai a si kho.
Kan fale nih hih nulepa sinah chim an duhmi bia tampi an rak ngei ve nain nulepa nih caan kan pek hna lo le daithlang in kan um sual ahcun kan i pehtlaihnak cu a ṭha kho hrimhrim lai lo. Kan fale hi nulepa nih caan kan rak pek deuh hna a herh ko.
Hlathlainak an tuahmi chungah nulepa le fale pehtlaihnak a ṭhatnak dingah biapibik cu ‘caan pek hi a si ko’ tiah an ti. Nikhat ah a tlawmbik minit 10 in kan fale an bia ngaihpiak khawhnak caan kan ser khawh ahcun kan i pehtlaihnak hi ṭhat lei a panh ko lai tiah hlathlainak nih a peh chap. Phundang chim ahcun kan fale hi nikhat ah minit 10 in an bia ngaihpiaknak caan serpiak hrimhrim ding tikhi a si.
Kan fale he pehtlaihnak ṭha kan ngei maw? Kan ngeih lo sual ahcun zeitindah a lam kan kawl lai? Kan fale he lumsa ngaiin bia kan i ruah kho maw?
Nikhat ah ah a tlawmbik minit 10 in kan fale bia ngaihnak caan pe hmanh usih, thla khat chungah zeitluk dah kan i pehltaihnak aa dan kha kan theih ko lai..