Minung kan lungthin umtuning hrim ahhin aa lawm kho, a ngaihchia kho phun kan rak si. A zungzal in aa lawm pengmi minung an um lo bantukin a zungzal in a ngaih a chia pengmi minung zong an rak um ve lo.
Aruang um huaha loin chikhat teah ngaihchiat, lungnuamh lo le thinhan na hmang sual tawn maw?
US ahhin a tlangpiin khuasik thla (winter) ah ruahlo piin ngaihchiatnak tuar, lungretheihnak le lungthin damlonak pawl hi tuar khun an si tiah hlathlainak an tuahmi nih an langhter.
Zeiruangah khuasik thla ah cun kan lungthin umtuning cu aa mah deuh hnga lo? Lungretheihnak le lungnuamh lonak khuasik thla ah kan ton khunnak a ruang cu;
- Khua muih a tuanh caah nikhua ceu kan hmuhmi a tlawm. Cu nih cun minung lungthin umning zeimaw a thlen ve ti a si.
- Leng chuak tuk loin inn chungah kan um deuh caah pum cawlcanghnak a tlawm deuh caah.
- Kan eidin kan i ralring khawh lo caah kan pum rihzan a kai deuh caah.
- Cawlcanghnak a tlawm caah kan khuaruah caan a tam caah kan ruahmi tamdeuh nih lungretheihnak ah a kan hruai.
- Social Media ah kan caan tamdeuh kan hman caah thawngchia tamtuk kan thei.
A si kun ah, khuasik thla ah lungthin nuam loin kan um sualnak hnga lo zeitindah kan i ven lai?
- Nikhua a ṭhat deuh caan ah leng chuah deuh a herh. Ni (sun) hi minung kan lungthin a nuamhnak ding caah a rak biapi tuk.
- Pum cawlcanghnak (excercise) tuah deuh a herh.
- Eidin thiam a herh.
- Zan ihning caan hman tein, a tlawmbik ah sml 7-8 ihpiak a herh.
- Mah duhmi, huammi kha lungtho tein tuah pah lengmang a herh.
- Baibal relnak le thlacamnak caan pek deuh a herh.
- Hawikom, innpa hna he i lenkai, phone zong i chawnh pah a herh.
A cunglei 1 in 7 tiang hi kan tuah khawh ahcun khuasik thla i minung tampi nih an ton lengmangmi ruahlo piin ngaihchiatnak, lunglawmh lonak in kan luat deuh ko lai.
Nifatin kan nunnak hi lawmhnak in nuam tein kan hman awk cu a si. Kan nunnak hi lungretheihnak le phannak nih a uk tuk ahcun lawmhnak he kan i hlat ko lai.