Ti caan hman tein din khawh hi ngandamnak caah a ṭhami a si. Nikhat ah zeitluk dah ti kan din cio? Siibawi te ruahnak pekning ahcun nikhat ah hrai 7-8 kar din khawh ahcun a ṭha tiah an ti. Nain minung hi kanmah le kan takpum sining hoih in dinpiak khawh ahcun a ṭha chinchin.
Mah le pum rihzanning in ti caan hman tein dinpiak khawh ahcun a ṭhabik. Tahchunhnak ah kan pum rihzan 140lbs a si ahcun kan rihzan hnarcheu 70 oz (hrai 8) hrawng kan takpum nih ti a herh tinak a si.
Nifatin kan eimi kip ahhin ti an rak um ve. A tlangpi in kan eimi pawl i 20% hi ti a rak i tel. Thingthei le tisik anhnah pawl ah ti aa telmi an rak tampi. Cun juice, cawhnuk le a dagndang kan dinmi pawl ahhin ti an rak um len ve. Cu pawl tuak chih cun a tlawmlei ah nikhat ah hrai 5-7 karalak hi cu rak dinpiak a herh. Zinglei deuh ah ti dinpiak khawh hi a ṭha.
Thal caan ahhin khua a linh caah kan um sawhsawh zongah thlan a chuak tawn. Cuti thlan chuah a hmangmi ca hrim ahcun ti hi a hlei bak in rak din piak a herh. Khuasik caan innchung ah a lummi (heat) kan chuah caah thli a lum i kan takvun a rocar ter caah ti piak a hau.
Pumsa damlo in kan um lio caan ah kan tak a lin, cun kan luak hna a chuah tawn caah a hlei in ti din than a herh. Cun kan chung nih a kan tlik tik zongah ti hi tampi in kan din piak a hau.
A hlei in fano a ngeimi nu hna nih nau hnuk an dinh tik hna ah an pum chungah ti tam deuh a um a herh. Nikhat ah nau no ngei nih hrai 13 hrawng cu a din a herh ti a si. Cun nau pawi liomi zong nih hrai 10 tel hi an din khawh ahcun a ṭha.
Ti hal kan theih tikah kan pum nih a tuar ahcun thiltha a si lem lo. Kan pum nih ti halnak a theih tikah kan chunglei hi tlawmpal tete in a rak rocar caah a si. Cucaah nifatin ti hi caan hmante in din khawh ahcun takpum caah a ṭhami a si. _Health.com