March 31 zinglei sml 5:30 hrawngah ka phone cakuat a lutmi thawng nih a ka ṭhangh. Mizoram Hnarchip ralzaam camp leiin kan unau pakhat nih hmantlak tamnawn a ka kuatmi a rak si. “Nizan cu ruah le thli nih fak tuk in a kan den caah kan umnak camp inn zeimawzat cu um awk ṭha loin a hrawh caah dornak kawl in kan um ko,” tiah ca tawite a ka kuat chih.
Hmanthlak pawl cu pakhat hnu pakhat ka zoh hna. Lungnuam lo ngaiin ka um i kai hngilh kho thai ti lo. Ka lu ka vun i mer i kannu le ka fanu hniang hnangam ngaiin an i hngilh ko kha ka hei zoh hna. Aw! Kannih vial hnangam ngai le siarem ngaiin kan um lioah kan miphun hawi cheukhat cu khoika dah kan i dor lai tiah fasem he an tli an zaam mu! Cuti cun it kho ti loin Hnarchip lei kan naupa he cun messenger in bia kan i ruah.
Hnarchip ralzaam camp ahhin innchungkhar 20 renglo an um i innchungkhar 10 inn hi fakngai in a hrawhmi cu an si. Umnak ṭha in remh a herh caah remh ṭhannak kong kan i ruah. “Thirkhenh, muka le thilri dangdang zalhnak hi khulrang in bawmh kan herh ko lai,” tiah a ka ti.
Zinglei kan tho hna. Kannu ka hei chimh i hmanthlak pawl cu ka fale zong ka zohter hna. Kannih cu hnangam tein kan um lio ahhin kan miphun hawi cheukhat cu harnak an tong. Cucaah thla nan campiak lengmang ve hna lai mu tiah ka fale cu ka hei chimh hna.
Mah hlan zan March 30 ah St. Louis Chin Emmanuel Church pastor he kan i chawn. “Kan miphun hawi ralzaam cheukhat hna sinah kan khrihfabu EM phaisa kuat ve kan duh hna,” tiah a ti.
A thaizing Thawhṭhan zingah Hnarchip lei kong cu ka hei chimh ṭhan. Nangmah nih a ṭha na tining in rak tawlrel ko law tiah phaisa cu zelle in an rak ka kuat colh i khulrang in Hnarchip lei cu kan hei kuat colh ve hna. Cuticun tlamtling tein an umnak inn 10 cu an remh khawh. Bawmhnak a tingco mi an i lawmh tlukin kai lawm ve. Bawipa nih a caanhman tein a herhnak taktak zawn ahcun a khan ko ti a ka ruahter.
Mah Zarhpini cu ka lung chungah Hnarchip lei kan miphun hawi kha an um ngaingai. Ka fale an pahnih in Sunday School an kainak ah student of the month an hmu. Inn kan phak tlawmpal ah ka fanu nih, “ka pa laksawng ka lakmi $20 ah $10 hi ralzaam inn a rawkmi kuat ka duh hna,” tiah a ka ti. Kai lawmhning cu a mak. Kum 10 ngakchia nih mah bantuk ruahnak ngeih cu ka ti.
Mah zan hi sangpumh zan a si caah thawngthachim ding kan pastor Rev. Thawng Lian cu ruahlopiin khual a kal caah thawngthachim an fial manh ti hna lo. Kannu nih nangmah nih kan chim ko law tiah 6:00 pumh dingmi kha 4:30 tluk ah a ka chimh. Aw si ko ka ti i Baibal zoh caan zong a um ti lo.
Ka lungchung tein thla ka cam i Luke 10: 25 kha ka lungah a hung chuak i mah cucu tlawmpal ka rel. Cuticun mah zan cu “kan innpa cu mizeidah an si?” timi tlangtar in thawngtha ka chim. Ka thawngtha chimmi cu ka vun peh ṭhan te lai.