Minung kan i pehtlaihnak ah a biapibik cu holh hi a si. Holh aa dangmi le aa thei kho lomi cu pehtlaihnak ṭha ser a fawi lo. Phundang chim ahcun holh khat in bia kan i ruah khawh lomi he pehtlaihnak ṭha ser khawh a si hnga lo tinak. Pehtlaihnak a ṭhat lo ahcun, i dawtnak le i tlaihchannak taktak hi a um kho hnga maw?
Kan ram uknak ruangah Laimi tampi ramleng ah kan phan. Holh ṭha tein a ngeimi miphun kan si nain kan fale nih kan holh an thiam te lo sual ahcun nulepa le fale kar lakah pehtlaihnak ṭha a um lo ding hi phan a um ngaingai.
US ah a chuakmi ngakchia tamdeuh hi anmah le anmah cu English deuh an hmang. Laiholh ṭha tein a holh khomi an tlawm i, mi tamdeuh nih Laiholh hi an i harh pinah a thiam lomi hrimhrim an tam. An mawh hrimhrim lo. Nain nulepa daithlang lo tein kan holh Laiholh thiamternak hi kan ruah cio a herh ko.
Tulio Laimi tamdeuh kan dirhmun cun nulepa le fale karlak pehtlaihnak chiatlei a panh cuahmah. A ruang tampi lakah holh i theihthiam lonak hi biapi ngai a si pinah nunphung sining ruang zongah a si.
Nulepa tamdeuh hi English in fale he lumsa ngaiin bia aa ruah khomi kan tlawm. Laiholh ngaingai zongin lumsa tein bia aa chawn kho lomi innchungkhar zong kan um pah cang. Kan biaruahnak a tluan lo ahcun i tlaihchannak hi duhsah tein a hnursawn ko lai. Nulepa le fale holh i theihthiam lo ruangah buainak tete ton khawh a si. Cucaah kan fale Laiholh thiamter ding hi a biapi ko.
Kan fale kanmah holh thiamter ṭhannak dingah innchungkhar in kan thok ṭhan cio a herh. Khrihfabu kip ah Laica cawnnak biatak in kan kalpi cio ahcun kan i ṭhathnempi hrim ko lai. Kan daithlan sual ahcun kan fale tampi an upat deuh tikah kan zatlangbu he an i hlat pinah Biakinn hrim an panh te lai lo. Biakinn he an i hlat sual ahcun Khrih zumhnak hrim hi hnu an chit te ko lai.
Fale he lumsa tein bia kan i ruah khawhnak dingah kan fale hi kan holh thiamter cio dingin nulepa kan i zuam a herh. Kan fale kan holh kan thiamter hna lo ahcun anmah holh thiammi English hi nulepa nih kan cawn ṭhan a hau te kho men. Pehtlaihnak ṭha nulepa le fale karah a um khawhnak dingah kan hrinmi kan fale hna kan holh thiamter hi biapi tuk..