Happy senior couple spending time at the beach. Concepts about love,seniority and people

Minung Hi Zei Nih Dah A Kan Lawmhter?

Minung Hi Zei Nih Dah A Kan Lawmhter?

—————————————————————

Minung a simi paoh nih lawmhnak le ngandamnak hi biapi ngai ah ruah ciomi a si caah zei nih dah lunglawmhnak le damnak taktak hi a kan pek hnga?

1938 kum thokin Harvard hlathlaitu bu pakhat nih zei nih dah minung hi lawmhnak taktak a kan pek timi minung 724 sinah hlathlainak an rak tuah. An hmuh khawhmi cu ‘a ngan a dammi pehtlaihnak nih minung hi lawmhnak le ngandamnak leiah a kan hruai ko,’ tiah an langhter. Pehtlaihnak ṭha nih minung kan chan zong a sauter deuh tiah an langhter chap.

Hmunkip ah pehtlaihnak ṭha tein a ngei khomi minung hna cu lunglawmhnak le taksa ngandamnak an tingco ko tihi kum 85 hlathlainak an tuahmi chungin hmuh khawh a si.

Cun mibu he pehtlaihnak ṭha a ngei tuk lomi le mah te lawng um a hmang deuhmi hna nih lunglawmhnak an tingco tuk lo tiah hlathlainak an tuahmi ahcun hmuh khawh a si. Pehtlaihnak ṭha a ngei lomi hna cu an ngandamnak zong tuan ah a chiat deuh pinah an chan hrimhrim a tawi deuh tiah an langhter.

Cucaah;

– Innchungkhar ah nu le va kan i pehtlaihnak a ṭhat ding a biapi tuk.

– Nulepa le fale kan i pehtlaihnak a ṭhat ding zong a biapi tuk.

– Khrihfabu le kan zatlangbu zongah pehtlaihnak tha a biapi tuk.

– Kan riantuannak zongah pehtlaihnak ṭha a biapi tuk fawn.

A ngan a dammi pehtlaihnak ṭha cu minung kan nunnak ah a biapit tuk caah pehtlaihnak ṭha a ngeimi si dingin i zuam cio hna usih.