Ngakchia Sining Tahchunhnak Pahnih

Ngakchia sining cu tlak le thlaikeu he tahchunh tawn an si. 

TLAK cu a cin lioah kan duhning pungsan in kan sersiam khawh nain a ro hnu ahcun remh len duh zongah remh khawh a si ti lo. Kan remh chih ahcun a kuai ko lai. Cubantuk cun ngakchia nunnak zong hi tlak bantukin an cin (an no) lio caan ah nulepa nih Pathian duhning, Khrihfa nuncan ziaza dawh he kan cawnpiak hna awk an rak si. An no lioah cawnpiak tuk loin an kum a upat deuh hnu i kan cawnpiak hna ahcun nulepa le fale kar pehtlaihnak aa rawk khomi a si. Kan fale an no lio caan hi an biapi tuk hringhran. 

THLAIKEU ṭha cu lei ṭha ah tuhmi in a chuakmi a si. Nain lei ṭha ah tuhlomi thlaikeu cu non pek an herh hnga. Thlai tuhtu nih kan cinmi kha zeidah an lawh ti cu ruah lo awk a ṭha lo. Kan cinmi thlai hna hi zeidah an lawh zeibantuk non dah kan pek hna lai, ni hna an hmu maw, ti hna an hmu maw tbk pawl kha thlai tuhtu nih biapibik a ruahawk a si.

Cuti thlaikeu cawnghhrammi cu a caan a zat tikah thei ṭha an tlai ko lai. Conghhramh lomi thlai cu zeitik hmanhah thei ṭha an chuak tuk bal lo. 

Cubantuk in fale zong hi an no lio tein nulepa nih cawnpiaknak ṭha deuh le duhsak deuhmi, thlaikeu bantukin cawnghramh deuhmi cu mi ah an i chuah deuh ko tihi al awk ṭha lo a si. 

Nulepa cheukhat cu rian le phaisa kha biapi tuk ah kan chiah caah kan fale zei an lawh zong kan thei hna lo. An ngakchia rih ko kan ti lio caan ah tlak bang an ro hnuah cun nulepa nih mitthli he biatak in kan cawnpiak hna zongah an rawhnak lamtu a si kho. 

Thaadi zaangba in kan paw caah rian kan ṭuan. Hmanhseh phaisa hi minung nunnak ah i zat a um hrimhrim lai lo. Rian le phaisa kha biapi tuk in kan chiah i kan fale caah caan kan pek hna lo ruangah an nunning a rawh sual ding hi cu phan a um hringhran ko. 

Kan fale hi an nun a rawh sual i lamping an pial sual ahcun ngaihchiah chawva in remh khawh an si ti kho lo men. Kan fale an no lio caan teah caan pek khawh a rak biapi hringhran ko. 

‘A zulh awk a simi lam kha ngakchia cu cawnpiak law a upat tikah mah cucu a pialtak ti lai lo”. Phungthlukbia 22:6