Israel rammi nih nithiang tiah an sunhsakmi Shemini Atzeret lio caan teah Hamas ralhrang nih October 7 zinglei deika teah hriamnam ngan (rockets) a thong renglo in Israel ram leiah an rak kah. Cupin ah ramri khua pawl ah Hamas nih an luh hnawh hna i mino, ngakchia le upa hual loin an rak thah hna.
Ngakchia cheukhat cu an nu le an pa hmaiah an thah hna. Nulepa cheukhat zong an fale hmaiah an thah hna. Micheu tlaihhrem an tuar, thah lawng hmanh si loin an hnawng an tanmi hna zong an um tiah Israel nawlngeitu nih an thanh.
Hamas nih Israel ram cung i an tuahsernak ruangah Israel mipi 1400 renglo nunnak an liam cang i, minung 4500 renglo hliamhma an tuar tiah Israel nawlngeitu hna nih an thanh.
Tutan Israel thilcang ah US rammi zong a tlawmbik 32 an nunnak a liam tiah US State department nih an thanh ve.
Israel nawlngeitu an chimning ah Hamas nih an tlaihmi hna hi minung 203 an si tiah an zumh.
Israel nih Gaza Strip lei i Hamas an umnak deuh le an cawlcanghnak hmun a si lai tiah an zumhmi inn pawl cu van ralkap in an kah hna caah inn tamlak te an ciam.
Israel nih Hamas cung i lehrulhnak fak an tuah caah a tlawmbik 3400 an thi cang i 12000 renglo hliamhma an tuar tiah Palestine ngandamnak lei nih an thanh ve.
Israel nih Gaza Strip i a ummi mipi pawl cu khua chuahtak in himnak hmun leiah kal dingin ralrin an pek hna.
Israel mipi nih an tonmi cungah US nih biatakin cawlcanghnak an tuah colh i US secretary of state Blinken zong Israel ah a kal hmasa hnuah President Biden zong Israel a va phan ve i Israel PM Benjamin Nethanyahu he tonnak an ngei.
“Israel nih a ram le a mipi himnak dingah vennak nawl a ngei,” tiah President Biden nih a ti. President Biden cu Arabs ram hruaitu pawl he tonnak ngei ding an si nain Gaza i Khrihfa siizung hriamnam in kah a ton caah tonnak cu an let ṭhan.
Israel PM nih, “Ral chungah kan um. Ral tuk hi kan duh hrimhrim lo. Nain Hamas an tuahsernak cu a dih dongh tiang ṭuanvo kan lak lai. Kan tei lai,” tiah a ti.
Israel ralkap nih Gaza i Hamas ralhrawng pawl cu tanglei ke in luh hnawh dingin ramri ah timhcia an si cang i PM Benjamin Netanyahu pumpak hrim in ramri ralkap sinah tonnak a va ngei pah lengmang hna. Zeitik ah dah ke in Hamas pawl cu an luh hnawh hna lai theih a si rih lo. —ABC